Landare hau, Armeria generoko beste landare babestu bat dugu, ‘Bakana’ bezala sailkaturik dagoena Nafarroan eta ‘Kaltebera’ bezala EAEko Zerrenda Gorrian. Toloño-Kantabria-Kodes mendietako endemismoa da eta populazio guztiak bertan aurkitzen dira, elkarrengandik 50 km baino gutxiagora.
Armeria cantabrica subsp. vasconica
Dibisioa: Magnoliophyta
Klasea:Magnoliopsida
Subklasea: Caryophyllidae
Ordena: Caryophyllales
Familia: Plumbaginaceae
Klasifikazioa: Boiss. & Reut.Willk., 1868
Estatusa: ne
Morfologia
Landare iraunkorra da, haitzetan sakontzen den enbor sendoa duena eta adartxo txiki zurkarak sortzen dituena. Adartxo hauek hosto-errosetak garatzen dituzte, kuxin formakoak eta landareak itxura soropildua hartzen du. Erroseta bakoitzaren erdialdetik, hostorik gabeko zurtoin tenteak garatzen dira (eskapo deiturikoak), 10-15 cm-ko garaiera lortzen dutenak. Zurtointxo hauek iletxoak izaten dituzte eta hauen puntan, infloreszentziak garatzen dira.
Hostoak
Errosetatan multzokatutako hosto hauek oso estuak dira, 2mm-ko zabalera baino gutxiagokoak. Linearrak dira eta nerbio bakarrekoak (batzutan bi albo-nerbio).
Loreak
Infloreszentziak glomerulu motakoak dira eta gehienez 25 mm-ko diametroa lortzen dute. Loreak brakteek eratutako inbolukru baten bidez babestuta daude eta barrualdeko brakteek forma obobatu-oblongoa dute. Inbolukru hau hur kolorekoa da eta leka moduko batean amaitzen da, zurtoina inguratzen duena eta glomeruluen tamaina berdinekoa edo txikiagoa dena. Loreek inbutu formako kaliza dute eta hauen azpialdea hodi formakoa da, iletxoz estalitako sahiets nabariekin. Gainaldea orbelkara da eta 5 lobulu triangeluar ditu. Korola arrosa da, 5 petalo oblongo ditu, oinarritik elkarri leunki loturik daudenak. 5 estamin ditu, petalo bakoitzaren oinarrian txertatzen direnak, hauen parean. Kalizaren oinarria gogortuta egoten da eta bertan sortuko da fruitua.
Fruituak
Fruitua, ia indehiszentea, oinarrialdetik irregularki apurtzen da.
Antzeko espezieak
Ez dago antzeko espezierik
Banaketa
Oso banaketa-eremu txikia du eta Toloño-Kantabria-Kodes mendietako endemismoa da (gehienez 50 km-ko distantziara daudelarik). Obarenes mendian (Burgos), ez da populaziorik aurkitu eta hedatzekotan, espezie honek ekialdetik egingo lukela uste da. Izan ere, hegoaldeko mendiak ez dira nahikoa garaiak espezie honentzako eta trantsisiozkoetan (Entzia-Urbasa) dagoeneko genero berdineko beste taxoi bat bizi da (Armeria pubinervis subsp. orissonensis), bertako baldintza hezeagoetara hobe moldaturik dagoena.
Habitata
Habitat bereko espezie gehiago
Ekologia
Kareharrizko harkaitz bertikaletako pitzadura txikietan hazten da, beti iparralderantz orientaturik eta eskualde haizetsuetan. Landare alpetar edo subalpetarra da.
Fenologia
Kareharrizko harkaitz bertikaletako pitzadura txikietan hazten da, beti iparralderantz orientaturik eta eskualde haizetsuetan. Landare alpetar edo subalpetarra da.